సూపర్ స్టార్ ఇంటికి దారేది?

చెన్నై నగరాన్ని మరోసారి భారీ వర్షాలు కుదిపేస్తున్నాయి. గడిచిన 24 గంటలుగా వర్షాలు కురుస్తూనే ఉన్నాయి. నిన్న సాయంత్రం నుంచి కాస్త తెరిపి ఇచ్చినప్పటికీ, ఈరోజు మళ్లీ వర్షాలు మొదలయ్యాయి. ఈ క్రమంలో చెన్నైలోని లోతట్టు ప్రాంతాలు మరోసారి జలమయమయ్యాయి. ఈసారి వరద రజనీకాంత్ ఇంటిని కూడా తాకింది.

చెన్నైలోని ఖరీదైన పోయెస్ గార్డెన్ లో రజనీకాంత్ ఉంటున్నారు. ఈ ప్రాంతంలోకి కూడా వరద వచ్చింది. రజనీకాంత్ ఇంటి గేటును దాటి లోపలకు నీరు వచ్చింది. ఈ ప్రాంతానికి వెళ్లే మార్గాలన్నీ జలమయమయ్యాయి. ప్రస్తుతం రజనీకాంత్ ఇంట్లోనే ఉన్నారు.

కొన్ని రోజుల కిందట ఆయన అస్వస్థతకు గురైన సంగతి తెలిసిందే. ఈనెల ప్రారంభంలో ఆయనకు వైద్యలు సర్జరీ నిర్వహించి, స్టెంట్ అమర్చారు. ఆ తర్వాత కొన్ని రోజులకు డిశ్చార్జ్ అయిన రజనీకాంత్, ప్రస్తుతం విశ్రాంతి తీసుకుంటున్నారు.

ఇదే ప్రాంతంలో రజనీకాంత్ తో పాటు చాలామంది ప్రముఖుల నివాసాలు ఉన్నాయి. తాజాగా హీరో ధనుష్ కూడా 150 కోట్ల రూపాయలు పెట్టి, ఈ ఏరియాలో ఓ బంగ్లాను కొనుగోలు చేశాడు.

ప్రస్తుతం చెన్నైలో రెడ్ అలర్ట్ ప్రకటించారు. స్కూల్స్, కాలేజీలకు శెలవులిచ్చారు. ఐటీ ఉద్యోగులకు వర్క్ ఫ్రమ్ హోమ్ కల్పించారు. ఈరోజు, రేపు వర్షాలు కురుస్తాయని అధికారులు చెబుతున్నారు.