తండేల్ లో ఆ సీన్ హైలైట్!

జస్ట్ ఓ లవ్ స్టోరీ కాదు. శ్రీకాకుళం జిల్లా మత్స్యకారుల జంట కథ ను తీసుకుని అల్లిన కథ మాత్రమే కాదు. అంతకు మంచి అంటున్నారు నిర్మాత బన్నీవాస్. కేవలం ఇది ప్రేమ కథ కాదని, అంతంత మాత్రం చదువుకున్న మత్స్యకారుల్లో నిగూఢంగా దాగిన దేశభక్తి కూడా ఇందులో వుందని అన్నారు.

ఆర్టికల్ 360 రద్దు తరువాత కరాచీలో జరిగిన కొన్ని దారుణమైన సంఘటనలను ఈ సినిమాలో చూపించినట్లు తెలిపారు. ఆ సంఘటనలు ఏమిటి అన్నది వెల్లడించలేనని, సినిమాలో చూడాల్సిందే అని అన్నారు. పాక్ జైలులో మగ్గే మత్స్యకార ఖైదీలు తాము రాసే ఉత్తరాల చివన్న జైహింద్ అని అస్సలు భయం లేకుండా ఇంగ్లీష్ లో రాసేవారని తెలిసి తాను, దర్శకుడు చందు మొండేటి ఆశ్చర్యపోయామన్నారు. అదే సమయంలో మన ఖైదీలను ఏ విధంగా హింసించారో తెలిసిన తరువాత గుండె బాధతో బరువెక్కిందన్నారు.

ఈ సినిమా ప్రతి ఒక్కరికీ ప్రత్యేకం అని హీరో చైతన్య ఈ సినిమా కోసం చాలా అంటే చాలా కష్టపడ్డారని, గంటల తరబడి ఎండలో నిల్చుని స్కిన్ టోన్ మారడం కోసం ప్రయత్నించారని అన్నారు. సాయిపల్లవి కొన్ని సెకండ్ల పాటు ఆగకుండా చేసిన డ్యాన్స్ అలరిస్తుందన్నారు. హీరో అక్కడ.. హీరోయిన్ ఇక్కడ అనే ఫీల్ లేకుండా.. ఇద్దరూ కలిసే వున్నారనే ఫీల్ వచ్చేలా సినిమా చిత్రీకరణ వుంటుందన్నారు.

ఇంటర్వెల్ బ్యాంగ్ చిత్రీకరణకు ఎన్నో ఇబ్బందులు ఎదురయ్యాయని, వాటిని అధిగమించి చిత్రీకరించామని బన్నీ వాస్ చెప్పారు. సినిమాలో శివతాండవం పాట కొన్నాళ్ల పాటు నిలిచిపోతుందన్నారు. సినిమాలో సిజి వర్క్స్ వున్నా, వీలయినంత వరకు ఒరిజినల్ సీన్లు చిత్రీకరించడానికే ట్రయ్ చేసామన్నారు. మంగుళూరు దగ్గర సముద్రం మీద వీటిని రియలిస్టిక్ గా రియల్ గా చిత్రీకరించామని చెప్పారు.

సినిమాకు తొంభై కోట్ల వరకు ఖర్చు చేసామని నాన్ థియేటర్ ఆదాయం యాభై కోట్ల వరకు వచ్చిందని, మరో నలభై కోట్ల వరకు థియేటర్ నుంచి రాబట్టగలమన్న నమ్మకం వుందని బన్నీవాస్ అన్నారు.