ముచ్చ‌ట‌గా మూడో పార్టీ కండువా క‌ప్పుకోనున్న ఆర్‌.కృష్ణ‌య్య‌

బీసీ ఉద్య‌మ నాయ‌కుడు ముచ్చ‌ట‌గా మూడో పార్టీ కండువా క‌ప్పుకోనున్నారు. బీజేపీలో చేరి, ఆ పార్టీ త‌ర‌పున రాజ్య‌స‌భ‌కు ఎన్నిక కానున్నారు. వైసీపీ త‌ర‌పున రాజ్య‌స‌భ‌కు ఎన్నికైన ముగ్గురు స‌భ్యుల్లో రాజీనామా చేసిన వారిలో ఆర్‌.కృష్ణ‌య్య కూడా ఉన్నారు. తాజాగా ఖాళీ ఏర్ప‌డిన మూడుస్థానాల‌కు ఎన్నిక‌లు జ‌ర‌గ‌నున్నాయి.

వీటిలో మోపిదేవి వెంక‌ట‌ర‌మ‌ణ రాజీనామాతో ఖాళీ ఏర్ప‌డిన స్థానం మాత్ర‌మే ఇత‌రుల‌తో భ‌ర్తీ కానుంది. ఇది కూడా టీడీపీకే ద‌క్క‌నుంది. మూడింటిలో రెండు టీడీపీకి, ఒక‌టి బీజేపీకి అనుకున్నారు. బీజేపీ అభ్య‌ర్థి ఎవ‌రో అధిష్టానం నిర్ణ‌యిస్తుంద‌ని ఏపీ బీజేపీ చీఫ్ పురందేశ్వ‌రి రెండు రోజుల క్రితం ప్ర‌క‌టించారు. చివ‌రికి ఆర్‌.కృష్ణ‌య్య‌తో ఆ సీటు భ‌ర్తీ చేయనున్నార‌ని తెలిసింది.

2014లో రాష్ట్ర విభ‌జ‌న స‌మ‌యంలో ఆర్‌.కృష్ణ‌య్య అనూహ్యంగా తెలంగాణ‌లో టీడీపీ త‌ర‌పున బ‌రిలో నిలిచి గెలుపొందారు. ఆ త‌ర్వాత టీడీపీకి రాజీనామా చేశారు. 2019లో ఏపీలో వైసీపీ అధికారంలోకి రావ‌డంతో ఆయ‌న జ‌గ‌న్‌తో స‌న్నిహిత సంబంధాలు ఏర్ప‌ర‌చుకున్నారు. వైసీపీ త‌ర‌పున రాజ్య‌స‌భ‌కు ఎన్నిక‌య్యారు. వైసీపీ అధికారానికి దూరం కావ‌డంతో ఆ పార్టీకి, ప‌ద‌వికి రాజీనామా చేశారు.

ఇప్పుడు ముచ్చ‌ట‌గా మూడోసారి మూడో పార్టీ కండువా క‌ప్పుకోనున్నారు. బీసీ ఉద్య‌మ నాయ‌కుడిగా ఎంతో గౌర‌వాన్ని సంపాదించుకున్న ఆర్‌.కృష్ణ‌య్య‌, రాజ‌కీయ నాయ‌కుడి అవ‌తారం ఎత్తాక‌, ఏమ‌వుతున్న‌దో అంద‌రూ చూస్తున్నారు. రానున్న రోజుల్లో ఆయ‌న ఇంకెన్ని ర‌కాలుగా మార‌నున్నారో!