అమెరికాలో ఇద్దరు తెలుగు విద్యార్థులు మృతి

అమెరికాలోని కనెక్టికట్ రాష్ట్రంలో ఇద్దరు తెలుగు విద్యార్థుల అనుమానాస్పద మృతి పట్ల ఉత్తర అమెరికా ఏపీ ప్రభుత్వ ప్రత్యేక ప్రతినిధి పండుగాయల రత్నాకర్ దిగ్భ్రాంతి వ్యక్తం చేశారు.

విద్యార్థుల కుటుంబాలకు ప్రగాఢ సానుభూతి తెలిపారు. మృతులు శ్రీకాకుళంకు చెందిన నికేశ్ (21), వనపర్తికి చెందిన దినేష్ (22) గా గుర్తించారు. ఉన్నత విద్య కోసం రెండు వారాల క్రితమే సదరు విద్యార్థులు అమెరికాకు వెళ్లినట్టుగా మృతుల కుటుంబ సభ్యులు తెలిపారు.

ఘటనకు సంబంధించిన పూర్తి వివరాలు ఇంకా తెలియాల్సి ఉందని రత్నాకర్ అన్నారు. శ్రీకాకుళం విద్యార్థి నికేశ్ పార్థివదేహాన్ని భారత్ కు రప్పించేలా ఏపీ ముఖ్యమంత్రి కార్యాలయం ప్రయత్నిస్తోందని, మృతుని కుటుంబానికి అన్ని విధాలుగా ప్రభుత్వం అండగా ఉంటుందని రత్నాకర్ తెలిపారు.

అమెరికా లో వున్న Team Aid అనే స్వచ్చంద సంస్థ మృతులకు సహాయ కార్యక్రమాలు అందిస్తోంది.