మే 9 రిలీజ్.. మేం నమ్మం దొర

వాళ్లు చెప్పింది మళ్లీ మళ్లీ చెబుతూనే ఉన్నారు. ఇటు పుకార్లు వాటి పని అవి చేస్తూనే ఉన్నాయి. హరిహర వీరమల్లు సినిమా మేటర్ ఇది. ఈ సినిమా పోస్ట్ పోన్ అయిందని మేకర్స్ చెప్పడం లేదు. మే 9న వస్తున్నామంటూ ప్రతిసారి చెబుతున్నారు. అదే టైమ్ లో ఈ సినిమా చెప్పిన తేదీకి రాదంటూ ఊహాగానాలు కూడా వినిపిస్తున్నాయి.

ఇప్పుడు మరోసారి ఇదే రిపీటైంది. హరిహర వీరమల్లు నుంచి ప్రకటన వచ్చింది. రీ-రికార్డింగ్, డబ్బింగ్, విజువల్ ఎఫెక్ట్స్ పనులు శరవేగంగా జరుగుతున్నాయని మే 9న థియేటర్లలోకి వస్తామని ప్రకటించారు. మరోవైపు సోషల్ మీడియాలో “మేం నమ్మం దొర” అంటూ పోస్టులు పడుతున్నాయి.

మేకర్స్ ప్రకటనలో కొత్తదనం ఏమీ లేదు, వాళ్లు ఇవ్వాల్సిన అసలైన క్లారిటీ ఇవ్వలేదు. కాబట్టి ఈ సినిమాపై పుకార్లు తగ్గుతాయని అనుకోవడం అత్యాశే అవుతుంది.

ఈ సినిమాకు సంబంధించి పవన్ కల్యాణ్ చేయాల్సిన ఓ బ్లాక్ పెండింగ్ లో ఉంది. ఆ షూటింగ్ అయితే తప్ప సినిమా విడుదలపై క్లారిటీ రాదు. ఆ విషయం చెప్పకుండా ఇలా ఎన్ని ప్రకటనలు చేసినా ఉపయోగం లేదు. దానిపై మాత్రం యూనిట్ స్పష్టత ఇవ్వడం లేదు.

మేకర్స్ వరస చూస్తుంటే, కీలకమైన ఆ బ్లాక్ ను పక్కనపెట్టి సినిమా షూటింగ్ కు గుమ్మడికాయ కొట్టినట్టున్నారు. అదే కనుక జరిగితే వచ్చేనెల 9కి రావడం పెద్ద కష్టమేం కాదు.