Epaper
జనసేన పార్టీ పెట్టాక, పవన్‌కళ్యాణ్‌ సినిమాల్లో ఇక నటించే అవకాశం లేదనే ఫిక్సయిపోయారు చాలామంది పవన్‌ అభిమానులు. కారణం, మెగాస్టార్‌ చిరంజీవి ప్రజారాజ్యం పార్టీ పెట్టాక సినిమాలకు దూరమైపోవడమే. ఐదేళ్ళ నుంచీ 150వ సినిమా చేస్తానని చిరంజీవి అనడం తప్ప, ఆ సినిమా ఇప్పటిదాకా పట్టాలెక్కలేదు.
మరి, పవన్‌ విషయంలో ఏం జరుగుతుంది.? త్వరలో హైద్రాబాద్‌ ఎన్నికలపై దృష్టిపెడతా.. అని చెప్పిన పవన్‌, రెండు సినిమాలు ఖచ్చితంగా చేస్తా, ఆ తర్వాత విషయం చెప్పలేనని అంటున్నాడు. కానీ, పవన్‌ ఆ రెండు సినిమాలైనా చేస్తాడా.? అన్నది సస్పెన్సే. జూన్‌ మొదటి వారంలో పవన్‌ సినిమా సెట్స్‌పైకి రానుందట.
పవన్‌ చేయాల్సిన సినిమాలు రెండున్నాయిప్పుడు. ఒకటి సంపత్‌ నంది డైరెక్షన్‌లో ‘గబ్బర్‌సింగ్‌`2’ కాగా, ఇంకొకటి ‘ఓ మై గాడ్‌’ రీమేక్‌. ఈ రెండు సినిమాలు పూర్తయితే పవన్‌ అభిమానులకి పండగే. కానీ, సినిమా సెట్స్‌పైకి వచ్చినా, షూటింగ్‌ ఎలా జరుగుతుంది.? షూటింగ్‌ పూర్తయి ఎప్పటికి విడుదలవుతాయి.? అన్న సస్పెన్స్‌ మాత్రం అభిమానుల్ని వెంటాడుతోంది.
‘తీన్‌మార్‌’ నుంచి సినిమాల జోరు పెంచిన పవన్‌, ‘గబ్బర్‌సింగ్‌’, ‘అత్తారింటికి దారేది’ సినిమాలతో అభిమానుల్లో కొత్త ఆశలు రేకెత్తించాడు. మరిప్పుడు చేయాల్సిన రెండు సినిమాల్ని పూర్తి చేసి, అభిమానుల్ని పవన్‌ అలరిస్తాడా.? వేచి చూడాల్సిందే.