బీజేపీ మిత్రులు కాక‌పోతే.. హిందూద్రోహులేనా?

బీజేపీ మిత్రులు అయితే ప‌ర‌మ నాస్తికులు, క్రిస్టియానిటీతో సంబంధం ఉన్న వారు , బీఫ్ తినేవారు అయినా ప‌ర‌మ హిందూ మిత్రులు. అదే బీజేపీ తో దోస్తీ చేయ‌ని వారంతా వారు ఏ స్థాయిలో ఉన్నా, వారు ఆచ‌రించే ప‌ద్ధ‌తుల్లో చిత్త‌శుద్ది ఉన్నా.. హిందూ ద్రోహులే! దేశంలో క‌మ‌లం పార్టీలో చేరితే పునీతులు అయిన‌ట్టుగా, బీజేపీ కూట‌మిలో భాగ‌స్వామ్యులు అయితే చాలు వారు హిందూవీరులైపోతారు!

ఉదాహ‌ర‌ణ‌గా చంద్ర‌బాబునే తీసుకుంటే, ఈయ‌న నాస్తికుడ‌ని అంటారు. అయితే ఇప్పుడు చంద్ర‌బాబు నాయుడు త‌న‌దో వెంక‌టేశ్వ‌ర‌స్వామే చెప్పించాడంటూ పూన‌కం వ‌చ్చిన‌ట్టుగా మాట్లాడుతూ ఉన్నారు! అయితే ఇదే చంద్ర‌బాబు నాయుడు గ‌తంలో అయ్య‌ప్ప స్వామి దీక్ష విష‌యంలో చేసిన వ్యాఖ్య‌లు, ఆయ‌న పాల‌న‌లో కూల‌గొట్టిన గుళ్లు, పుష్క‌రాల్లో జ‌రిగిన దుర్ఘ‌ట‌న‌లు ఇవ‌న్నీ లెక్క‌లోకి రావు! చంద్ర‌బాబుకు షూ వేసుకుని పూజ‌లు చేసినా.. ఆయ‌న ఇప్పుడు వెంక‌టేశ్వ‌ర‌స్వామితో స‌మానం అంతే!

ప‌వ‌న్ క‌ల్యాణ్.. ఈయ‌న మాట‌ల‌కు అంతూపొంతు ఉండ‌దు! త‌న తండ్రి ఇంట్లో దీపారాధన‌కు ముట్టించిన దీపాల‌తో సిగ‌రెట్లు ముట్టించుకునేవాడ‌ని చెప్పుకునేది ఆయ‌న‌! త‌న పిల్ల‌ల‌కు బాప్టిజం ఇప్పించిన‌ట్టుగా, త‌న‌కు మేరీ మాత అంటే ఎంత ఇష్ట‌మో చెప్పిందీ ఆయ‌నే! ఆయ‌న పిల్ల‌లు హిందువులు కాదు, ఆయ‌న ప్ర‌స్తుత భార్యా హిందువు కాదు! మ‌రి త‌న‌కు పుట్టిన పిల్ల‌ల‌నే హిందువులుగా పెంచ‌లేని ప‌వ‌న్ క‌ల్యాణ్ ఈ రోజు హిందువులు రోడ్ల మీద‌కు రావాలంటూ పిలుపునిస్తారు! ముస్లింల‌తో మీటింగుల‌కు వెళ్లి బీఫ్ తిన‌డం గురించి వివేకానందుడి ఉవాచ‌ను చెప్పుకొచ్చారు! అది సంద‌ర్భ‌మా? అసంద‌ర్భ‌మా అనేది ప‌వ‌న్ క‌ల్యాణ్ కు అన‌వ‌స‌రం. ఆయ‌న తోచింది మాట్లాడ‌తారు. ఇప్పుడు ఆయ‌న ఏపీలో హిందుత్వ‌కు టార్చ్ బేర‌ర్!

వీళ్లు బీజేపీతో దోస్తీ చేస్తున్నారు కాబ‌ట్టే ఇదంతా! రేపు బీజేపీతో ట‌ర్మ్స్ చెడితే ఇదే ప‌వ‌న్ క‌ల్యాణ్, చంద్ర‌బాబులు హిందుత్వ వాదం గురించి ఏదైనా మాట్లాడ‌గ‌ల‌రు! బీజేపీని మ‌సీదులు కూల్చే పార్టీ అని చంద్ర‌బాబు, మ‌తాల మ‌ధ్య‌న చిచ్చు పెట్టేది హిందూ నేత‌లే అని ప‌వ‌న్ క‌ల్యాణ్ వీడియోల ముందే చాలా సార్లు చెప్పారు! ఇప్పుడు హిందుత్వం ట్రెండ్ అవుతోంది, దానితో త‌మ‌కు రాజ‌కీయ ల‌బ్ధి క‌లుగుతుంద‌ని వీరు ఇప్పుడు ఇలా మాట్లాడుతూ ఉన్నారు. క‌మ‌లం పార్టీతో దోస్తీ కాబ‌ట్టి వీరు ఏదైనా చెబుతారు!

త‌ను ముఖ్య‌మంత్రిగా ఉన్న‌ప్పుడు జ‌గ‌న్ శ్రీవారి బ్ర‌హ్మోత్స‌వాల స‌మ‌యంలో ప‌ట్టు వ‌స్త్రాలు స‌మ‌ర్పించారు. జ‌గ‌న్ తండ్రి వైఎస్ రాజ‌శేఖ‌ర రెడ్డి సీఎం హోదాలో ఈ విధి నిర్వ‌ర్తించారు. ఉమ్మ‌డి ఏపీలో భ‌ద్రాద్రి శ్రీరాముడికి కూడా రాష్ట్ర ప్ర‌భుత్వం త‌ర‌ఫున శ్రీరామ‌న‌వ‌మి పెట్టే పెట్టిపోత‌ల‌ను కూడా వైఎస్ నిర్వ‌ర్తించారు. సిస‌లైన హిందులు ఎన్ని ఆచారాల‌ను పాటిస్తాడో తెలియ‌దు కానీ, అధికారిక హోదాల్లో ఎక్క‌డా ప్ర‌భుత్వ పెట్టిపోత‌ల విష‌యంలో వైఎస్ కానీ, జ‌గ‌న్ కానీ భంగం క‌లిగించ‌లేదు.

ఏ రోజూ చంద్ర‌బాబులా హిందుత్వ సంప్ర‌దాయాల‌ను నీఛంగా మాట్లాడ‌నూ లేదు! హిందులే చిచ్చు పెడ‌తారు ,ఇత‌ర మ‌త‌స్తులు మంచోళ్లు అంటూ ప‌వ‌న్ క‌ల్యాణ్ లా స్టేట్ మెంట్లూ ఇవ్వ‌లేదు. మ‌తం అనేది ప్రైవేట్ వ్య‌వహారం. అలాగ‌ని హైంద‌వ సంస్కారాల‌కు ఎక్క‌డా లోటు రానీయ‌లేదు త‌మ హ‌యాంలో! అయితే వీరిని చిత్రీక‌రించే విష‌యంలో 15 యేళ్ల నుంచి ఒక‌టే రొద‌. ఇప్పుడూ అదే కొన‌సాగుతూ ఉంది!

అయితే వీరే కాదు, క‌ర్ణాట‌క‌లో సిద్ధ‌రామ‌య్య‌ను అంటారు. సిద్దూ హిందూవు. కురుబ కుల‌స్తుడు. క‌ర్ణాట‌క‌లో బీజేపీ హిందుత్వ పోక‌డ‌ల‌కు వెళ్తుంది కాబ‌ట్టి, సిద్ద‌రామ‌య్య‌ను కూడా హిందూ వ్య‌తిరేకిగా చిత్రీక‌రించేందుకు భ‌క్తులు పాట్లు ప‌డుతూనే ఉంటారు! త‌మిళ‌నాడులోనే వీరి ఆట‌లు సాగ‌డం లేదు. స‌నాత‌న ధ‌ర్మాన్ని బాహాటంగా వ్య‌తిరేకించేందుకు వెనుకాడ‌రు క‌రుణానిధి కుటుంబీకులు. రాముడు ఇంజ‌నీరా అని క‌రుణానిధి ప్ర‌శ్నించాడు. అదే బాట‌లో క‌రుణ త‌న‌యుడు స్టాలిన్, ఆయ‌న త‌న‌యుడు ఉద‌య‌నిధి కూడా సాగుతూ ఉన్నారు. మ‌రి రేపు కేంద్రంలో డీఎంకే మ‌ద్ద‌తు అవ‌సరం అయితే బీజేపీ తీసుకోదా అంటే.. అలాంటిదేమీ లేదు!

ఇప్పుడు తెగ ఇదైపోతున్న హిందుత్వవాదులు, బీజేపీ వాళ్లు కూడా .. మొన్న‌టి వ‌ర‌కూ జ‌గ‌న్ త‌న ఎంపీల‌తో బీజేపీ బిల్లుల‌కు మ‌ద్ద‌తు ప‌లికితే.. స్వాగ‌తిస్తూ తీసుకున్నారు! ఇప్పుడు జ‌గ‌న్ చేతిలో సీట్లు లేవు కాబ‌ట్టి, ఈ హిందుత్వ ఫీట్లు!