తమ్మినేని రంగంలోకి దిగాల్సిందే!

ఉమ్మడి శ్రీకాకుళం జిల్లాలో పెద్దాయనగా దశాబ్దాల రాజకీయ అనుభవం కలిగిన మాజీ స్పీకర్ తమ్మినేని సీతారాంకి వైసీపీ అధినాయకత్వం గురుతరమైన బాధ్యతలు అప్పగించింది. ఆయనని పార్టీ హైలెవెల్ కమిటీ అయిన పీఏసీలో మెంబర్ గా నియమించింది.

తమ్మినేని చాలా కాలంగా పార్టీకి దూరంగా ఉంటున్నారని ఆయన అలిగారని రకరకాలైన ప్రచారం సాగుతున్న క్రమంలో ఆయనకు ఈ విధంగా అధినాయకత్వం మంచి గుర్తింపు ఇచ్చింది. దీంతో తమ్మినేనిని వదులుకోబోమని పార్టీ పెద్దలు తమ మనసులో మాటను చెప్పారని అంటున్నారు.

తమ్మినేని ఇక మీదట పార్టీలో చురుకైన పాత్ర పోషించేలా రంగంలోకి దిగాలని కోరుతున్నారు. ఉమ్మడి శ్రీకాకుళం జిల్లాలో బలమైన సామాజిక వర్గానికి చెందిన తమ్మినేని సీతారాం కి మొదటి నుంచి పార్టీలో తగిన ప్రాధాన్యత ఉంది.

అయితే ఇటీవల కాలంలో ఆయన సొంత నియోజకవర్గం ఆముదాలవలసలో ఇన్చార్జి పదవి నుంచి తప్పించడంతో ఆయన ఆగ్రహంగా ఉన్నారు అని ప్రచారం నడచింది. అయితే తమ కుటుంబ పరమైన విషయాల వల్లనే తాను పార్టీకి కొంత సమయం కేటాయించలేకపోయాను అని అప్పట్లో ఆయన వివరణ ఇచ్చారు.

అయినా సరే రాజకీయంగా ఆయన రీయాక్టివ్ అయితే కావడం లేదు. ఆయన వేరే ఆలోచనలు చేస్తున్నారు అని ప్రచారం సాగిన సందర్భం కూడా ఉంది. అయితే వాటిని పూర్వ పక్షం చేస్తూ అధినాయకత్వం ఆయనకు అగ్రాసనం అందించింది. ఇకనైనా తమ్మినేని తన పూర్వపు తీరుతో రాజకీయ జోరుని చూపిస్తారా అని వైసీపీలో అంతా తర్కించుకుంటున్నారు.