బాబుకు థాంక్స్ చెప్పిన గాదె!

ఉత్తరాంధ్ర టీచర్స్ ఎమ్మెల్సీ ఎన్నికల్లో మంచి విజయం సాధించి కూటమి మద్దతు ఇచ్చిన రఘువర్మను ఓడించిన గాదె శ్రీనివాసులు నాయుడు ముఖ్యమంత్రి చంద్రబాబుని మర్యాదపూర్వకంగా కలుసుకున్నారు. ఈ సందర్భంగా కూటమి సహకారంతో గెలిచాను అని బాబుకు థాంక్స్ చెప్పారు.

బాబు సైతం గాదెని అభినందించారు. గాదెతో పాటు బీజేపీ మాజీ ఎమ్మెల్సీ పీవీఎన్ మాధవ్ కూడా బాబుని కలిశారు. ఈ ఎన్నికల్లో బీజేపీ గాదెకి మద్దతు ఇచ్చిన సంగతి విధితమే. ఆ విధంగా గాదె కూటమి బలపరచిన అభ్యర్థిగానే పరిగణిస్తున్నారు.

ఉత్తరాంధ్రలో కూటమి మద్దతుతో పోటీ చేసిన రఘువర్మ ఓడినా గాదె కూటమి వారే అన్న సంకేతాలను ఈ విధంగా పంపించారని అంటున్నారు. ఎమ్మెల్సీగా ఏ రాజకీయ రంగు లేకుండా గెలిచాను అని ఇప్పటికే చెప్పిన గాదె సీఎం ని కలవడం మర్యాదపూర్వకమే అని అంటున్నారు.

ప్రభుత్వంతో సయోధ్య గా ఉంటేనే ఉపాధ్యాయ సమస్యలు పరిష్కారం అవుతాయన్న ఆలోచనతోనే ఆయన ప్రభుత్వ పెద్దలను కలిశారు అని అంటున్నారు. అయితే రానున్న రోజులలో ప్రభుత్వం ప్రవేశపెట్టబోయే బిల్లులకు గాదె మద్దతు ఇచ్చే విషయం మీదనే ఆయన కూటమి వైపు ఉన్నారా లేదా అన్నది తెలుస్తుందని అంటున్నారు.

అయితే ఉపాధ్యాయ సమస్యల విషయంలో ప్రజా సమస్యల విషయంలో పోరాటం చేయడంతో పాటు ప్రజలకు మేలు చేసే బిల్లుల విషయంలో మద్దతు ఇవ్వడంతో తప్పు లేదన్నది గాదే వర్గీయులు అంటున్న మాట. నిర్మాణాత్మకమైన పాత్రని పోషించడం ద్వారానే ప్రజలతో ప్రభుత్వంతో అనుసంధానం కావచ్చు అన్నది కూడా కొత్త ఎమ్మెల్సీ ఆలోచన అని అంటున్నారు.