ఈసారి ఎన్టీఆర్ ఓటు వేస్తాడట..!

మరో 3 రోజుల్లో జరగబోతున్న మూవీ ఆర్టిస్ట్ అసోసియేషన్  ఎన్నికల్లో పోలింగ్ బూత్ వరకు వచ్చి ఎన్టీఆర్ ఓటు వేస్తాడా వేయడా..? ఇదే ఇప్పుడు హాట్ టాపిక్ గా మారింది. ఊహించని విధంగా జీవిత రాజశేఖర్ ఎన్టీఆర్ పేరును ప్రస్తావించడంతో.. ఎన్నికల కోలాహలంలో తారక్ కూడా భాగమయ్యాడు. ఈసారి ఎన్నికల్లో తారక్ ఓటేస్తాడా వేయడా అనే చర్చ ఊపందుకుంది.

ఎన్నికలపై ఎన్టీఆర్ అసంతృప్తి వ్యక్తంచేశాడంటూ జీవిత ఇచ్చిన స్టేట్ మెంట్ పై ఇప్పటికే ప్రకాష్ రాజ్ రియాక్ట్ అవ్వగా.. తాజాగా ఈ అంశంపై మంచు విష్ణు కూడా రియాక్ట్ అయ్యాడు. ఎన్టీఆర్ తో ఈ అంశంపై తను స్వయంగా మాట్లాడిన విషయాన్ని బయటపెట్టాడు.

“మూవీ ఆర్టిస్ట్ అసోసియేషన్ ఎన్నికల్లో ఎన్టీఆర్ పేరు ఎందుకు ప్రస్తావించారో నాకైతే అర్థంకాలేదు. బట్ అందరూ ఏదేదో అంటున్నారు కాబట్టి నేను ఎన్టీఆర్ తో మాట్లాడాను. ఈసారి పోలింగ్ కు ఎన్టీఆర్ వస్తాడు. తప్పకుండా నాకే ఓటేస్తాడు.”

ఇలా ఎన్టీఆర్ ఎపిసోడ్ కు తెరదించే ప్రయత్నం చేశాడు మంచు విష్ణు. ఎన్టీఆర్ తో పాటు స్టార్ హీరోలు ఎవరు ఓటింగ్ కు వచ్చినా, ఆ ఓటు తనకే పడుతుందని గట్టిగా చెబుతున్నాడు మంచు విష్ణు.

“ఎన్టీఆర్, మహేష్, చరణ్, ప్రభాస్, బన్నీ.. వీళ్లందరూ నాకే ఓటేస్తారు. కాకపోతే వాళ్లు ఓట్ వేయడానికి రావాలి. ఎన్నికల కంటే ముందు షూటింగ్ ఇంపార్టెంట్. ఏమాత్రం వెసులుబాటు దొరికినా వాళ్లు ఓటేస్తారు. ఆ ఓటు నాకే పడుతుంది. ఎఫ్3 షూట్ లో చాలామంది ఆర్టిస్టులున్నారు. ఓటేయడానికి దిల్ రాజు పర్మిషన్ ఇవ్వాలి కదా. మహేష్ ఊరిలో లేడు. ప్రభాస్ ఏ రోజు ఎక్కడుంటాడో ఎవ్వరికీ తెలీదు, అంత బిజీ.”

ఓట్ల కోసం సభ్యులకు డబ్బులు పంచుతున్నారంటూ నాగబాబు చేసిన వ్యాఖ్యల్ని మంచు విష్ణు ఖండించాడు. ఓటుకు 10వేలు ఇస్తున్నారంటూ నాగబాబు ఆరోపిస్తే.. తను లక్ష రూపాయలు ఇవ్వాలనుకున్నట్టు మంచు విష్ణు జోక్ చేశాడు. డబ్బుల్లేని అసోసియేషన్ కు, బిల్డింగే లేని అసోసియేషన్ కు ఎన్నికలు జరుగుతుంటే.. ఆ ఎన్నికల కోసం సభ్యులకు ఎవరైనా డబ్బులిస్తారా అని ప్రశ్నించాడు.