కుమారి ఆంటీ… రేవంత్ ఇప్పుడు కూడా!

బీఆర్ఎస్ నుంచి కాంగ్రెస్‌లో చేరిన దానం నాగేంద‌ర్ తీవ్ర అసంతృప్తిలో ఉన్నార‌నే ప్ర‌చారం జ‌రుగుతోంది. దానం మాట తీరు చూస్తే, ప్ర‌భుత్వంపై వ్య‌తిరేకంగా ఉన్నార‌న్న అభిప్రాయాన్ని క‌లిగిస్తోంది. తాజాగా దానం నాగేంద‌ర్ మ‌రోసారి మీడియాతో మాట్లాడుతూ అధికారుల‌పై విరుచుకుప‌డ్డారు.

మాదాపూర్‌లో కుమారి ఆంటీకి స‌మ‌స్య రాగానే, ఆమె జోలికి వెళ్లొద్ద‌ని సీఎం రేవంత్‌రెడ్డి అధికారుల్ని హెచ్చ‌రించార‌ని దానం గుర్తు చేశారు. ఇప్పుడు కూడా రేవంత్‌రెడ్డి పుట్‌పాత్ ఆక్ర‌మ‌ణ‌ల తొల‌గింపుల‌పై అధికారుల‌కు అలాంటి ఆదేశాలే ఇవ్వాల‌ని డిమాండ్ చేయ‌డం గ‌మ‌నార్హం. లేదంటే ప్ర‌భుత్వానికి చెడ్డ‌పేరు వ‌స్తుంద‌ని ఆయ‌న అన్నారు.

అధికారులు తామే సుప్రీం అనుకుంటూ ప్ర‌వ‌ర్తిస్తున్నార‌ని విమ‌ర్శించారు. అధికారుల‌కు పూర్తి స్వేచ్ఛ ఇస్తే ప్ర‌భుత్వాలు మ‌నుగ‌డ సాగించ‌లేవ‌ని దానం ఆందోళ‌న వ్య‌క్తం చేశారు. త‌న‌కు రాజ‌కీయ జ‌న్మ‌నిచ్చింది హైద‌రాబాదే అని ఆయ‌న అన్నారు. అందుకే తాను ప్రాతినిథ్యం వ‌హిస్తున్న ఖైర‌తాబాద్‌కే తాను ప‌రిమితం కాద‌ని ఆయ‌న స్ప‌ష్టం చేశారు. హైద‌రాబాద్‌లో ఎక్క‌డైనా ఎవ‌రికి స‌మ‌స్య వచ్చినా తాను ముందుంటాన‌ని ఆయ‌న చెప్పుకొచ్చారు.

హైడ్రా చేప‌ట్టిన కూల్చివేత‌ల‌పై తాను మాట్లాడాన‌న్నారు. ఇప్పుడు పుట్‌పాత్‌ల ఆక్ర‌మ‌ణ‌ల‌పై స్పందిస్తున్న‌ట్టు నాగేంద‌ర్ తెలిపారు. పుట్‌పాత్‌ల‌పై పేద ప్ర‌జ‌ల జీవ‌నాధారాల్ని అధికారులు ధ్వంసం చేస్తున్నార‌ని ఆయ‌న మండిప‌డ్డారు. ఎలాంటి నోటీసులు ఇవ్వ‌కుండా ఆక్ర‌మ‌ణ‌ల పేరుతో తొల‌గించ‌డం ఏంట‌ని ఆయ‌న ప్ర‌శ్నించారు. అధికారుల చ‌ర్య‌ల‌తో జ‌నం మ‌ధ్య తాము తిర‌గ‌లేక‌పోతున్న‌ట్టు నాగేంద‌ర్ ఆవేద‌న వ్య‌క్తం చేశారు.