అక్రమ సంబంధం టు హత్య వయా వ్యభిచారం

హైదరాబాద్ లో జరిగిన జంట హత్యల కేసును పోలీసులు ఛేదించారు. ఈ కేసులో మలుపులు, ఫైనల్ గా హత్య ఎందుకు జరిగిందనే కారణం తెలుసుకొని పోలీసులే అవాక్కయ్యారు.

పుప్పాలగూడలోని అనంత పద్మనాభస్వామి ఆలయ గుట్టల్లోని నిర్మానుష్య ప్రాంతంలో 2 మృతదేహాల్ని చూసిన స్థానికులు, పోలీసులకు సమాచారం అందించారు. అక్కడ్నుంచి కేసును మొదలుపెట్టిన పోలీసులు, మధ్యప్రదేశ్ వెళ్లి ముగ్గుర్ని అదుపులోకి తీసుకున్నారు. అసలేం జరిగిందో చూద్దాం..

అంకిత్ సాకేత్ అనే వ్యక్తిది మధ్యప్రదేశ్. ఇక బిందు అనే మహిళది ఛత్తీస్ గఢ్. ఇద్దరికీ సంబంధం లేదు. హైదరాబాద్ లోని నానక్ రామ్ గూడలో కలుసుకున్నారు. బిందుకు అప్పటికే పెళ్లయింది, ముగ్గురు పిల్లలు కూడా. అయినప్పటికీ అంకిత్ సాకేత్ కు ఆకర్షితురాలైంది. అతడితో అక్రమ సంబంధం పెట్టుకుంది.

విషయం తెలుసుకున్న బిందు భర్త, ఆ ప్రాంతం వదిలిపెట్టి దూరంగా ఉన్న వనస్థలిపురం వెళ్లిపోయాడు. అయితే అంకిత్ సాకేత్, బిందు మాత్రం తమ అక్రమ సంబంధాన్ని విడిచిపెట్టలేదు. భర్త లేని సమయంలో అప్పుడప్పుడు అంకిత్ సాకేత్ ను కలిసేది బిందు.

ఈ క్రమంలో బిందుతో అక్రమ సంబంధం పెట్టుకోవడంతో పాటు, ఆమెను వ్యభిచారంలోకి దించాడు అంకిత్ సాకేత్. ఇందులో భాగంగా తన స్నేహితుల వద్దకు బిందును తీసుకొని వెళ్లాడు. అలా రాహుల్ కుమార్, రాజ్ కుమార్, సుఖేంద్ర కుమార్ లకు బిందు పరిచయమైంది. వీళ్లలో రాహుల్ కుమార్ కు బిందు బాగా నచ్చింది. ఆమెతో 2 సార్లు ఏకాంతంగా గడిపిన రాహుల్, ఆ క్షణాల్ని తన మొబైల్ ఫోన్ లో చిత్రీకరించాలని ప్రయత్నించాడు. దీనికి బిందు నిరాకరించింది. విషయాన్ని అంకిత్ కు చెప్పింది.

అంకిత్, రాహుల్ కు మధ్య గొడవ జరిగింది. రాహుల్ ఇగో హర్ట్ అయింది. అంకిత్-బిందును హత్య చేయాలని నిర్ణయించుకున్నాడు. మరోసారి బిందును బుక్ చేసుకునే నెపంతో అంకిత్-బిందును పుప్పాలగూడ గుట్టల్లోకి రప్పించాడు. అందరూ కలిసి గుట్టల్లో మద్యం సేవించారు. టైమ్ చూసి బిందును పక్కకు తీసుకెళ్లాడు సుఖేంద్ర. అదే టైమ్ లో అంకిత్ ను మిగతా ఇద్దరూ కత్తితో పొడిచి, రాయితో బాది హత్య చేశారు. ఆ తర్వాత బిందును కూడా హత్య చేశారు.

ఇలా ఇద్దర్నీ హత్య చేసిన తర్వాత రాహుల్ కుమార్, రాజ్ కుమార్, సుఖేంద్ర కుమార్ తమ సొంత రాష్ట్రమైన మధ్యప్రదేశ్ కు పారిపోయారు. అటు బిందు భర్త, తన భార్య కనిపించడం లేదని అప్పటికే పోలీసులకు ఫిర్యాదు చేయడంతో కేసు మొదలైంది. సాంకేతిక ఆధారాల ద్వారా వారం తిరక్కముందే ఈ కేసును కొలిక్కితెచ్చారు పోలీసులు. మధ్యప్రదేశ్ వెళ్లి ముగ్గుర్నీ అరెస్ట్ చేశారు. అలా ఓ అక్రమ సంబంధం రెండు హత్యలకు దారితీసింది.