బాలయ్య పిలవలేదు.. రానా అయినా పిలుస్తాడా?

అన్ స్టాపబుల్ ఇప్పటివరకు 3 సీజన్లు పూర్తయ్యాయి. ఒక్కసారి కూడా ఎన్టీఆర్ ను పిలవలేదు. ప్రస్తుతం నాలుగో సీజన్ నడుస్తోంది. ఆల్రెడీ చంద్రబాబు, సూర్య, అల్లు అర్జున్ లాంటి వాళ్లు వచ్చారు. ఇంకొన్ని ఎపిసోడ్స్ బ్యాలెన్స్ ఉన్నాయి. అయినప్పటికీ ఎన్టీఆర్ వస్తాడనే గ్యారెంటీ లేదు.

ఎందుకంటే, తమది నందమూరి వంశమని చెప్పుకునే బాలకృష్ణకు, ఎన్టీఆర్ కు మధ్య కొన్ని కుటుంబ సమస్యలున్నాయి. వీటికి అదనంగా రాజకీయ వైరుధ్యాలూ ఉన్నాయి. వీటన్నింటినీ దాటుకొని అన్ స్టాపబుల్ లో ఎన్టీఆర్ కనిపించడం అసాధ్యం.

ఇప్పుడు అలాంటిదే మరో టాక్ షో వస్తోంది. అది రానా చేస్తున్నాడు. కనీసం రానా అయినా ఎన్టీఆర్ ను పిలుస్తాడా అనేది ప్రశ్న. ఒకవేళ రానా పిలిచినా ఎన్టీఆర్ వస్తాడా అనేది మరో ప్రశ్న.

ఎన్టీఆర్ మాత్రమే కాదు.. చిరంజీవి, నాగార్జున లాంటి వాళ్లు కూడా బాలయ్య షోలో కనిపించలేదు. ఇటు రానా షోలో కూడా వాళ్లు కనిపించలేదు. మరి వీళ్ల ఎంట్రీపై రానా ఏమంటున్నాడు?

“నా ఇంటర్వ్యూల్లో ఎవరి పేర్లు ఎక్కువగా వినిపిస్తున్నాయో వాళ్లందర్నీ నా షోకు పిలిచే ఆలోచనలో ఉన్నాను. ఎన్టీఆర్, నాగార్జున, చిరంజీవిని కూడా పిలవాలని ఉంది. కాకపోతే నాకు పరిమిత ఎపిసోడ్స్ మాత్రమే ఉన్నాయి. సీజన్-1 హిట్టయితే, సీజన్-2కు మరింత మంది సెలబ్రిటీల్ని పిలుస్తా.”

రానా స్టేట్ మెంట్ బట్టి చూస్తే.. ఈ దఫా ఎన్టీఆర్ లేడని అర్థం. మరి రానా గెస్టుల్ని ఎలా ఎంపిక చేశాడు. దీనికి కూడా రానా దగ్గర సమాధానం ఉంది. రియల్ లైఫ్ లో తను ఎవరితో బాగా క్లోజ్ గా, సరదాగా ఉంటున్నాడో వాళ్లను పిలిచానని, త్వరలోనే మిగతా వాళ్లను కూడా పిలుస్తానని అంటున్నాడు.

ఈ సందర్భంగా మహేష్, రామ్ చరణ్ పై కూడా క్లారిటీ ఇచ్చాడు రానా. రాజమౌళితో సినిమా చేస్తున్న కారణంగా మహేష్ తన కార్యక్రమానికి వచ్చే ఛాన్స్ లేదని, చరణ్ కు మాత్రం కాల్ చేస్తానని, షోకు ఆహ్వానిస్తానని అంటున్నాడు.