సక్సెస్ కోసం రేటు కూడా తగ్గించాడు?

హిందీ హీరోలంతా సౌత్ వైపు చూస్తున్నారు. మరీ ముఖ్యంగా తెలుగు దర్శకులతో సినిమాలు చేసేందుకు ఆసక్తి చూపిస్తున్నారు. కొంతమంది తెలుగు డైరక్టర్లు చేస్తున్న సినిమాలు నార్త్ బెల్ట్ లో కూడా బాగా ఆడుతున్న నేపథ్యంలో, ఈ నిర్ణయం తీసుకున్నారు.

అయితే ఈ విషయంలో మరో అడుగు ముందుకేశాడు హృతిక్ రోషన్. సౌత్ డైరక్టర్స్ తో కలిసి పనిచేయడానికి అందరూ ఆసక్తి చూపిస్తారు. హృతిక్ మాత్రం అవసరమైతే తను పారితోషికం కూడా తగ్గించుకుంటానని ప్రకటించడం విశేషం.

హృతిక్-బాబి కాంబినేషన్ లో సినిమా వస్తుందంటూ నిన్నట్నుంచి ప్రచారం నడుస్తోంది. ఈ కాంబినేషన్ వర్కవుట్ అవుతుందో లేదో తెలియదు కానీ, కొన్ని రోజుల కిందట హృతిక్ చేసిన ఈ స్టేట్ మెంట్ మాత్రం ఇప్పుడు వైరల్ అవుతోంది.

అన్ని అర్హతలుండి, బ్లాక్ బస్టర్ కొట్టలేకపోయిన హీరో ఎవరైనా ఉన్నారంటే బాలీవుడ్ లో అది హృతిక్ మాత్రమే. సౌత్ దర్శకులతో కలిసి ఆ లోటును భర్తీ చేసుకోవాలని భావిస్తున్నాడు హృతిక్.

ఎన్టీఆర్ తో కలిసి వార్-2 సినిమా చేసిన ఈ నటుడు, తారక్ ను తన బెస్ట్ కో-స్టార్ గా చెప్పుకొచ్చాడు. ఇప్పుడు తెలుగు దర్శకుల కోసం రెడ్ కార్పెట్ పరిచాడు. ఈ అవకాశాన్ని ఏ దర్శకుడు వాడుకుంటాడో చూడాలి.