ఆశపడితే.. బతుకు బస్టాండేనా?

వైఎస్సార్ కాంగ్రెస్ పార్టీ ఈ ఎన్నికల్లో ఓడిపోయింది గనుక.. ఇక ఆ పార్టీలో ఉండడం అనవసరం అని, తమ తమ తక్షణ ప్రయోజనాలు నెరవేర్చుకోవడం కోసం అధికార పార్టీలో చేరిపోతే మంచిదని భావించే వారికి ప్రస్తుత పరిణామాలు షాకింగ్ గా కనిపిస్తున్నాయి.

వైఎస్సార్ కాంగ్రెస్ నుంచి ఫిరాయించి వచ్చే వారికి ఆశ పెట్టడం, ప్రలోభాలు చూపించడం, తాయిలాలు ప్రకటించడం వంటివి కూటమి పార్టీ నేతలు బాగానే చేస్తున్నారు. కానీ.. ఒకసారి ఆ పార్టీకి రాజీనామా చేసేసిన తర్వాత.. ఇక పట్టించుకోవడం లేదు. వారిని త్రిశంకుస్వర్గంలో ఉంచేస్తున్నారు. వారి పరిస్థితి ఎటూ కాకుండా పోతోంది. కూటమి పార్టీల ఆఫర్లకు ఆశపడితే.. ఇక బతుకు బస్టాండేనా అనే అభిప్రాయం వారిలో కలుగుతోంది.

ఎన్నికల ఫలితాల తర్వాత ఇప్పటికే వైఎస్సార్ కాంగ్రెస్ పార్టీని వీడిన వారు పలువురు ఉన్నారు. వీరు ఏ పార్టీలో చేరబోతున్నారు అనేది ఇంకా క్లారిటీ రావడం లేదు. అవతల ఆయా పార్టీలు వీరిని చేర్చుకోవడానికి రెడ్ కార్పెట్ వేస్తున్నాయా? లేదా బారికేడ్లు పెడుతున్నాయా? అనే క్లారిటీ కూడారావడం లేదు.

పోతుల సునీత వైసీపీకి రాజీనామా చేయడానికి ముందే తెలుగుదేశంలో చేరబోతున్నట్టుగా ప్రకటించారు. గతంలో ఆమె ఆ పార్టీ నుంచే వైసీపీలోకి వెళ్లారు. చంద్రబాబును తీవ్రస్థాయిలో తూలనాడారు కూడా. తిరిగి ఇప్పుడు తెదేపా అంటున్నారు. కాకపోతే ఆమె ఎంట్రీకి లోకల్ గా సొంత నియోజకవర్గంలో తెదేపా నేతలు అభ్యంతరం చెబుతున్నట్టు సమాచారం.

ఇన్నాళ్లూ పార్టీ నేతలను వెంటాడిన, దూషించిన పోతుల సునీత ఇప్పుడు అవకాశవాదంతో మళ్లీ పార్టీలోకి వస్తానంటే చేర్చుకోవద్దని వారు మొండికేస్తున్నారు. దాంతో ఇది వరకు ఆమె చేరికకు గ్రీన్ సిగ్నల్ ఇచ్చిన చంద్రబాబు కూడా సొంతపార్టీలో ముసలం పుట్టకుండా ఇప్పుడు పునరాలోచనలో ఉన్నట్టు సమాచారం. తెలుగుదేశంతో బేరాలాడుకుని, చేరికకు ఓకే అనిపించుకున్న అనేక మంది నాయకుల పరిస్థితి కూడా ఇలాగే ఉంది.

తెలుగుదేశమే ముందు వారికి ఆశ పెడుతోంది, ప్రలోభ పెడుతోంది. తీరా వైసీపీకి రాజీనామా చేసేసిన తర్వాత.. వారి గురించి పట్టించుకోవడం లేదని.. లోకల్ లీడర్లలో వ్యతిరేకత పేరుతో నాటకాలాడుతున్నారని కొన్ని విమర్శలున్నాయి. తెదేపా వ్యవహార సరళిలో.. ఆ నాయకులను తమ పార్టీలో చేర్చుకోవడం కంటె, వైసీపీలో లేకుండా చేయడమే ప్రధానాంశంగా ఉన్నట్టు తెలుస్తోంది.