భూమి చుట్టూ రాజకీయం

‘ధన మూలం ఇదం జగత్’ అని ఆర్యోక్తి. జగత్తులో ప్రతివ్యవహారానికి ధనమే మూలం అని ఈ సూక్తి మనకు చెబుతుంది. ఆధునిక వేదోక్తి ఏంటంటే.. ‘భూ మూలం ఇదం జగత్’! అవును ఇప్పుడు సంపద అంటే భూమే. వ్యక్తులు భూమిని సంపద చిహ్నంగా చూడడంలో వింత లేదు.. కానీ రాజకీయ నాయకులు, అధికారంలో ఉండే ప్రభుత్వాలు కూడా భూమిని సంపదగా మార్చేసి ‘నిల్ బ్యాలెన్స్’ చేసేయాలని ఆరాటపడుతుండడమే అసలు చింత! సంపద సృష్టి అనే పదం ఒక మిథ్య. ‘భూ మంత్రకాళి..’ అని ఉచ్ఛరించే మంత్రగాళ్లు.. భూమిని సంపదగా చూపిస్తారు. సృష్టి జరిగినట్టుగా భ్రమపెడతారు. పునఃసృష్టికి అవకాశం ఉన్న ఏ రూపంలో సంపద సృష్టి జరిగినా గొప్ప విషయమే.

అయితే.. పునఃసృష్టి ఊహకు కూడా అవకాశమివ్వని.. భూస్థితిని హరించేస్తూ.. సృష్టించే సంపద భవిష్యత్తుకు ఎలాంటి భరోసాను అందించగలుగుతుంది. ప్రత్యేకించి ప్రభుత్వాలు ఉన్న భూమినెల్లా తమ జమానాలోనే అరాయించుకోవాలని అనుకుంటే.. ‘రేపు’ అనేది ఎలా గడుస్తుంది? ఇలాంటి ఊహలు, ప్రశ్నలు మనలో వందల భయాల్ని పుట్టిస్తాయి. ఆ భయాలకు అక్షర రూపమే, ప్రభుత్వాలు పాల్పడుతున్న అరాచకపోకడలను పరామర్శించే ప్రయత్నమే ఈ వారం గ్రేట్ ఆంధ్ర కవర్ స్టోరీ ‘భూమి చుట్టూ పార్టీలు’!

పశువులు, ఆడవాళ్లను మాత్రమే సంపదలుగా భావించి వాటి కోసం పోరాటాలు ప్రారంభించిన మానవ జాతి.. ఆ తర్వాత చాలా కాలానికి భూమిని కూడా సంపదగా గుర్తించడం తెలుసుకుంది. ఆ తర్వాత భూమి కోసం యుద్ధాలు జరగడం ప్రారంభం అయింది. క్రమంగా భూమిచుట్టూనే కార్యకలాపాలు అన్నీ జరగడమూ మొదలైంది. బలవంతుడి మాటే చెల్లుబాటు అవుతుందనే ఆదిమ వేదనీతి ప్రకారం.. భూమికి హద్దులు గీసి ఇది నాది అని రొమ్ము విరుచుకుని చెప్పుకోగలిగిన, వాటిని కాపాడుకోగలిగిన బలవంతుడే.. తర్వాతి కాలంలో సంపన్నుడయ్యాడు. కాలం మారే క్రమంలో రాజ్యాలు, ప్రభుత్వాలు, ప్రజాప్రభుత్వాలు అన్నీ వచ్చాయి. భూ సంపద అనేది ప్రజల సంపదగా నిర్ణయం అవుతూ వచ్చింది.

ప్రజాప్రభుత్వాలు అనేవి ప్రజల ఆస్తులకు కేవలం ధర్మకర్తలుగా ఉంటూ వచ్చాయి. ఎందుకంటే.. ప్రజల సంపద అన్న తరువాత.. దానిని కాపాడడం భవిష్యత్ తరాలకు అందించడం అనేది ప్రభుత్వాల మౌలిక బాధ్యతగా ఉండాలి. కానీ.. ఇప్పుడు ప్రభుత్వాలు ఆ మౌలిక బాధ్యతనుంచి దూరం జరుగుతున్నాయి. తమ ప్రభుత్వ పాలన కాలం తరువాత.. యావత్తు భూమండలమే అంతమైపోతుందేమో అన్నట్టుగా.. ఉన్న భూమిని మొత్తం తమ ప్రభుత్వ కాలంలోనే ఖర్చు పెట్టేయాలన్నట్టుగా పార్టీలు వ్యవహరిస్తున్నాయి.

ప్రభుత్వాలు తీసుకుంటున్న నిర్ణయాల్లో రియల్ ఎస్టేట్ వ్యాపారమే కనిపిస్తోంది. ఏ నిర్ణయాలకైతే అభివృద్ధి అనే ముసుగు వేస్తున్నారో.. అదంతా కూడా రియల్ దందా లాగా చూపరులకు కనిపిస్తోంది. ఏ ఒక్కరి చర్యలను కూడా నిజాయితీగా గుర్తించలేని పరిస్థితి.. ప్రజల్లో ఏదో అనుమానం, భయం మొలకెత్తుతున్నాయి.

ఈ రియల్ వ్యాపారంలో ఏ ఒక్కరికీ మినహాయింపు లేదు.. నిన్నటిదాకా రాజ్యం చేసిన కల్వకుంట్ల చంద్రశేఖరరావు, వైఎస్ జగన్మోహన్ రెడ్డి, ఇవాళ కొత్తగా సింహాసనం అధిష్ఠించి అదే రియల్ కార్యకలాపాలకు మరో రకం ముసుగులు వేసి చెలరేగుతున్న రేవంత్ రెడ్డి, చంద్రబాబునాయుడు అందరిదీ ఒకటే దారిగా ఉంటోంది.

వేల్యూ పెంచే వ్యూహాలు పురాతనమైనవే..

నగరాల సంగతి పక్కన పెట్టండి. మీ గ్రామాల్లో టీటీడీ కల్యాణ మండపాలు ఉన్నాయా? కొద్దిగా నిన్నటితరంలో నిర్మించిన ఆర్టీసీ బస్సుస్టాండులు ఉన్నాయా? మీకు తెలిసిన గ్రామాల్లో అవి ఎక్కడ ఉన్నాయో గుర్తు చేసుకోండి. ఊరు ఒకచోట ఉంటే అవి ఊరికి దూరంగా ఎక్కడో ఉంటాయి! ఊరు ఒకచోట ఉంటే బస్సుస్టాండు కిలోమీటరు దూరంలో కట్టి ఉంటారు. టీటీడీ వారి కల్యాణ మండపాన్ని ఇంకో వైపు ఎడంగా విసిరేసినట్టుగా ఎక్కడో దూరంగా ఉంటుంది. ఈ నిర్మాణాలు సాధారణంగా ఆ ఊరిలో వదాన్యులైనటువంటి ఊరిపెద్దల, సంపన్నుల వితరణ శీలతతో రూపు దిద్దుకున్నటువంటివి. వారు స్థలదానం చేస్తే, ప్రభుత్వం తరఫునో, టీటీడీ తరఫునో ఆ నిర్మాణాలు ఏర్పడి ఉంటాయన్నమాట.

అప్పట్లో అలాంటి విధానం ఉండేది. ఒక గ్రామం నుంచి తమకు బస్సుస్టాండు నిర్మించండి అంటూ ఆర్టీసీకి అనేక దరఖాస్తులు వెల్లువెత్తుతాయి. లేదా, ఓ మోస్తరు పెద్ద గ్రామం అయితే.. తమకు ఓ కల్యాణ మండపం కట్టించి ఇవ్వమని టీటీడీకి వినతులు వెల్లువెత్తుతాయి. కొన్నాళ్ల తర్వాత.. అటువైపు నుంచి ఆమోదం వస్తుంది. మీ ఊరి నుంచి స్థలం విరాళంగా ఎవరైనా దానం ఇచ్చినట్లయితే.. నిర్మాణం తాము చేపడతామంటూ ఆమోదం లభిస్తుంది. ఆ వెంటనే ఊరిలోని ఒక భూకామందు.. దానికి అవసరమైన భూమిని విరాళంగా ఇస్తారు. అక్కడ నిర్మాణం జరుగుతుంది.

బస్సుస్టాండు లేదా కల్యాణ మండపం వచ్చింది అని ప్రచారం చేసి.. ఆ చుట్టు పక్కల ఉండే తమ ఎకరాల కొద్దీ పొలాల్లో సదరు కామందు రియల్ ఎస్టేట్ దందా నడిపిస్తారు. వచ్చిన నిర్మాణాన్ని చూపించి.. అక్కడిదాకా నివాసాలు వచ్చేస్తాయని అంటూ.. ఊదరగొట్టి చాలా సులువుగా అమ్మేస్తారు.

నిజానికి సదరు భూకామందుకు తన ఓపికకు మించిన భూసంపద ఉంటుంది. తాను స్వయంగా సేద్యం చేసుకోలేని, చేయించుకోలేని స్థితిలో ఉంటాడు. నిరుపయోగంగా మారిపోయిన భూములను వదిలించుకోవడానికి ఇలాంటి విరాళం ద్వారా ఒక రియల్ ఎస్టేట్ వేల్యూ సృష్టిస్తాడు. ఆ వేల్యూ ఒక నీటిబుడగ! కొన్ని చోట్ల నిజంగానే ఎప్పటికో ఒక నాటికి విలువ పెరగవచ్చు గాక.. కానీ అనేక స్థలాల్లో అసలు అవి ఎప్పటికీ అదనపు విలువను సంతరించుకోవు. అమ్ముకున్న దందా సాగించిన కామందు మాత్రమే బాగుపడతాడు. ఇది అత్యంత వంచనాత్మకమైన నిన్నటితరం లోకరీతి!

ఇవాళ్టి రోజుల్లో అయినా ఈ లోకరీతి మారలేదు. కాకపోతే అప్పటి భూకామందుల దందాను ఇప్పుడు ప్రభుత్వాలే నిర్వహిస్తున్నాయి. రియల్ ఎస్టేట్ వ్యాపారానికి ప్రభుత్వాలే పూనిక వహిస్తున్నాయి. నిజం చెప్పాలంటే.. పాలన సాగిస్తున్న పార్టీలు మొత్తం భూమి సంబంధిత కార్యకలాపాల చుట్టూతా మాత్రమే తమ వ్యవహారం నడిపిస్తున్నాయి.

తెలంగాణలో కోకాపేట కతలు సాగినా, పరిశ్రమలకు భూకేటాయింపులు జరుగుతున్నా.. ఆంధ్రప్రదేశ్ లో ఎగ్జిక్యూటివ్ రాజధాని ముసుగులో నిన్నటిదాకా ఓ ప్రహసనం నడిచినా, ప్రపంచం తలతిప్పి చూసే నగరం అని ఇవాళ ఒక గారడీ నడుస్తున్నా అన్నింటి వెనుక ఆయా పార్టీల రియల్ దందాలు పుష్కలంగా ఉన్నాయనేది నిజం.

ఇలాంటి దందాలకు ఆధునిక రూపం ఏంటంటే.. ఏ రియల్ ఎస్టేట్ సంస్థ వారికో కొన్ని వందల వేల ఎకరాలు ఎందుకూ పనికిరాని ఒక ప్రాంతంలో ఉంటాయి. అక్కడ వారు పదుల ఎకరాలను ఒక స్వామీజీ వారి ఆశ్రమానికి, ప్రభుత్వంలో కీలకంగా ఉండే వీవీఐపీ పెద్దలు నడిపే స్వచ్ఛంద సంస్థలకు, కాలేజీలు లాంటి వాటికి చాలా ఉదార హృదయంతో విరాళంగా ఇచ్చేస్తారు. వారికి ఎటూ చందాలు పోటెత్తుతుంటాయి కాబట్టి.. ఎంతో విలువైన నిర్మాణాలు ఆయా ప్రాంతాల్లో చిటికెలో వచ్చేస్తాయి.

ప్రధాన రహదార్లతో ఆ ప్రాంతాన్ని అనుసంధానం చేస్తూ ప్రభుత్వం రోడ్లు కూడా వేస్తుంది. అక్కడితో వారికి స్థలదానం చేసిన రియల్ సంస్థ వారు ఆశించిన ప్రయోజనం నెరవేరుతుంది. వారి భూములకు మొత్తం విలువ అమాంతంగా పెరిగిపోతుంది. దమ్మిడీకి అర్దనాకు ఆ భూములను కొన్నవారు ఏకంగా వందల కోట్ల రూపాయల విలువకు వాటిని అమ్ముకుని వదిలించుకుంటారు.

ఎకరం వంద కోట్లు!

కేసీఆర్ పరిపాలన కాలంలో హైదరాబాదులో రియల్ ఎస్టేట్ వ్యాపారం అలా తారాజువ్వలాగా లంబంగా ఆకాశానికేసి పెరిగిపోయినట్టుగా ఒక బూటకపు ప్రచారం బాగా జరిగింది. ప్రత్యేకించి ఏపీలో జగన్మోహన్ రెడ్డి ప్రభుత్వం ఏర్పడిన తర్వాత.. ఆ రాష్ట్రంలో రియల్ ఎస్టే రంగం స్తబ్దంగా మారింది. చాలా మంది బడా పెట్టుబడిదార్లు చంద్రబాబు చూపించిన గ్రాఫిక్స్ భ్రమలో పడి అమరావతిలో, ఆ చుట్టుపక్కల భారీగా పెట్టుబడులు పెట్టారు. జగన్ రాకతో ఆ నగర భవితవ్యమే ప్రశ్నార్థకంగా మారింది. ఎవరికి వారు.. అక్కడి కార్యకలాపాలను స్తంభింపజేసుకున్నారు.

ఈ నేపథ్యంలో.. నిరంతరం రియల్ వ్యాపార లావాదేవీల్లో మునిగి ఉండడం అలవాటైపోయిన వాళ్లు ఖాళీగా ఉండలేక హైదరాబాదు చుట్టుపక్కల వ్యాపారం మీదనే దృష్టి సారిస్తూ వచ్చారు. రియల్ లావాదేవీల సాంద్రత పెరిగిన మాట నిజం. కానీ.. తిమ్మిని బమ్మిని చేస్తూ అనూహ్యమైన రియల్ గ్రోత్ ఉన్నట్టుగా భ్రమలు ప్రచారం చేశారు.

పదిహేనేళ్ల కిందట టాలీవుడ్ లో ఒక సినిమా వచ్చింది. స్లాప్‌స్టిక్ కామెడీ, రియల్ పోకడలపై వెటకారం నిండిన సినిమా అది. ఊహకు అందని రేట్లు భూములకు వచ్చేస్తున్నాయంటూ ఆ సినిమాలో సెటైర్ ఉంటుంది. తమాషా ఏంటంటే.. ఆ సినిమా రూపకర్తలు కూడా అతిశయంగా ఊహించదగిన ధరను యాభైకోట్ల వద్ద లాక్ చేశారు.

‘భూ కైలాస్.. ఎకరం 50 కోట్లు’ అంటూ ఆ సినిమాకు టైటిల్ పెట్టారు. కానీ.. కేసీఆర్ జమానాలో ఆ సినిమాలోని వెటకారాన్ని తలదన్నేవిధంగా వాస్తవ రియల్ ధరలు ఆకాశంలోనే విహరించాయి. ప్రభుత్వ భూములను వేలం పెట్టి ఎకరం వందకోట్లకు విక్రయించిన వైనం అందరూ గమనించారు. ఆశ్చర్యంగా అనిపించే ఈ ధరల వెనుక మతలబులు వేరు. అన్నీ పుకార్ల రూపంలోనే అయినా రకరకాలుగా వినిపించాయి.

గులాబీ దళ పెద్దలకు ఆ ప్రాంతంలో వందల ఎకరాల విస్తీర్ణంలో భూములున్నాయని, ఎకరం వంద కోట్ల వంతున కొన్నటువంటి సంస్థ ద్వారా వాటి విలువను పెంచారని.. తద్వారా తమ ప్రెవేటు భూములు అన్నింటికీ భారీగా ధరలు పెంచుకున్నారని రకరకాల కథనాలు వినిపించాయి.

ఈ దృష్టాంతం సంగతి ఎలా ఉన్నప్పటికీ.. హైదరాబాదులో రియల్ గ్రోత్ అనేది ఒక నీటిబుడగగా ఇప్పుడు నిరూపణ అవుతోంది. వందల వేల ఫ్లాట్ లు ఉన్న అపార్టుమెంట్ భవనాల నిర్మాణాలు ఇప్పుడు స్తంభించినట్టుగా వార్తలు వస్తున్నాయి. ఇదిలా ఉండగా కొత్త సర్కారు సరికొత్త వ్యూహంతో వెళ్లవలసిన అగత్యం ఏర్పడింది.

తాజా దందాకు పరిశ్రమల ముసుగు!

ఇప్పుడు రేవంత్ రెడ్డి సర్కారు వంతు వచ్చింది. కేసీఆర్ సర్కారు ఏ రకమైన రియల్ ఎస్టేట్ దందాను నడిపించిందో అదే మార్గంలో వెళ్లడానికి అవకాశాలు కుంచించుకుపోయాయి. అదే మాటలతో దందా నడిపించే దారి లేదిప్పుడు. ఆయన ఎంచుకున్న కొత్త మార్గం.. పెట్టుబడులు, పరిశ్రమలు! అమెరికా పర్యటనలో సీఎం రేవంత్ రెడ్డి పారిశ్రామిక వేత్తలను కలిశారు. తెలంగాణలో పెట్టుబడులకు ఆహ్వానించారు. అందరికీ ఆయన పెడుతున్న ఆఫర్ ఒక్కటే. మా దగ్గర పెట్టుబడులు పెట్టండి.. మీకు అవసరమైనంత భూవసతి కల్పిస్తాం.. మౌలిక వసతులను ఏర్పాటుచేస్తాం అని మాత్రమే. అందరికీ భూమిని పంచిపెట్టేయడానికి రేవంత్ సర్కారు సిద్ధం అయిపోతోంది.

ఇలాంటి ఆఫర్లను అందుకుంటున్నప్పుడు కంపెనీల ఏర్పాటు కూడా ఒక నీటిబుడగ లాంటి వ్యవహారంగా జరిగే అవకాశం ఉంటుంది. ఒక పరిశ్రమ నడుపుతున్న వ్యక్తి నిత్యం దానిని విస్తరించడానికి ప్రయత్నిస్తూనే ఉంటాడు. ఎక్కడ కొత్త యూనిట్లు పెడితే లాభసాటిగా ఉంటుందో సర్వే చేస్తుంటాడు. తనంత తానుగా వ్యాపారావకాశాలను గమనించుకుని.. తానే స్థలం కొని పరిశ్రమ పెట్టడానికి పూనుకునేవాళ్లు!

ఉదాహరణకు అలా జరిగినప్పుడు పదెకరాల స్థలం కొనే సంస్థలు, ప్రభుత్వాలే తమ వెంటబడి ప్రాధేయపడుతోంటే.. వందల ఎకరాలు డిమాండ్ చేయడంతో తమ డీల్ చర్చలు ప్రారంభిస్తారు. అలా దందా మొదలవుతుంది. వారికి కేటాయించే భూములకు అటు ఇటుగా రాజకీయ నాయకుల, వారి బినామీల ప్రెవేటు భూములు పుష్కలంగా ఉంటాయి. ఆ దందా అలా సాగుతూ ఉంటుందన్నమాట.

నిజానికి ఇలాంటి ప్రక్రియకు చంద్రబాబునాయుడు ఎప్పట్లోనో శ్రీకారం చుట్టారు. ఒక సంస్థ ఏర్పాటుకు ఎంత స్థలం అవసరం అవుతుందో అంతకు రెండింతలు, మూడింతలు వారికి ధారాదత్తం చేయడం ద్వారా ఆ సంస్థలను ఆహ్వానించడం ఆయన విధానంగా సాగింది. ఇప్పుడు అన్ని ప్రభుత్వాలు కూడా అదే దారులను అనుసరిస్తున్నాయి.

జగన్ ముద్ర భిన్నం!

రియల్ ఎస్టేట్ దందా విషయంలో జగన్మోహన్ రెడ్డి ప్రభుత్వం సాగించిన దందా పూర్తిగా భిన్నమైనది. అమరావతిని రాజధానిగా కొనసాగించడం ఆయనకు ఇష్టం లేదు. అలాగని అపరిమితమైన ఆర్జన మార్గంగా కనిపించే రియల్ ఎస్టేట్ దందాను ఆయన విస్మరించదలచుకోలేదు. అభివృద్ధి పనులకు సంబంధించిన నిర్దిష్టమైన ప్రతిపాదనలు వస్తే వాటిని రియల్ వ్యాపారంలాగా చులకనగా చూసిన జగన్మోహన్ రెడ్డి కేవలం విశాఖను మాత్రమే తన అడ్డాగా ఎంచుకున్నారు.

ఎటూ అమరావతిని శాసన రాజధానిగా ప్రకటించినందుకు కనీసం అక్కడ చిన్నపాటి పనులు కూడా ఆయన చేపట్టలేదు. అలాగని.. ఏ విశాఖపట్టణాన్ని తాను ఎగ్జిక్యూటివ్ రాజధానిగా ప్రకటించారో అక్కడ కూడా ఆయన భూదందా తప్ప నిర్మాణాత్మక పనులతో ముందుకు తీసుకెళ్లలేదు.

వందల కోట్ల రూపాయలు ఖర్చు పెట్టి.. రుషికొండలో భవనాలు నిర్మించారు. టూరిజం శాఖ భవనాలుగా వాటిని నిర్మించినప్పటికీ.. అవీ సీఎంగా జగన్ నివాసం కోసమే నిర్మింపబడినవి అనే ప్రచారం బాగా ప్రజల్లోకి వెళ్లింది. కోర్టుకు అర్థం పర్థం లేని జవాబులు చెప్పారు. కాదు కూడదు.. కోర్టు కేసులు తెమిలిన తర్వాత నడపబోయే ప్రభుత్వ కార్యాలయాల కోసం వాటిని నిర్మిస్తున్నాం అనే మాట చెప్పడానికి జగన్ ప్రభుత్వానికి అవకాశం రాలేదు.

చంద్రబాబు నాయుడు- జగన్ ఒక విషయంలో మాత్రం ఏకరీతిగా తప్పుచేశారు. చంద్రబాబు వెలగపూడి సచివాలయాన్ని, హైకోర్టును నిర్మించి, వాటిని తాత్కాలిక భవనాలుగా ప్రకటించి.. ఇదే రాజధాని అనే భావన ఏర్పడకుండా చేశారు. జగన్ కూడా అంత అద్భుతమైన భవనాలు నిర్మించి అవి కేవలం టూరిజం గెస్టు హౌసులు అనడం ద్వారా.. విశాఖకు రాజధాని భవనాలు వచ్చినట్టే అనే భావనను అధికారికంగా ప్రజల్లోకి తీసుకెళ్లలేకపోయారు. ఈలోగా విశాఖనగరం, పరిసరాలంతటా కూడా రియల్ ఎస్టేట్ దందాలు శృతిమించిపోయాయి.

అయితే అనేక రియల్ లావాదేవీల్లో వైఎస్సార్ కాంగ్రెస్ వారి ప్రమేయమే ఉండడం, ఇతర జిల్లాలకు చెందిన వైసీపీ నాయకులంతా వచ్చి విశాఖలో రియల్ దందాలు నడిపిస్తూ ఉంటే.. స్థానిక ప్రజలు భయపడ్డారు. ఆ ఫలితం ఎన్నికల్లో కనిపించింది. విశాఖలోని రియల్ వ్యాపారం కూడా నీటిబుడగ లాగానే పేలిపోయింది.

ఇప్పుడిక చంద్రబాబు అమరావతి వంతు!

మళ్లీ చంద్రబాబు నాయుడు వంతు వచ్చింది. అమరావతి రాజధాని పేరుతో ఆయన యాభైవేల ఎకరాలు పోగేశారు. ఇది అధికారిక ప్రభుత్వ దందా మాత్రమే. కానీ.. ఆ పరిధికి బయట ఎన్ని వేల ఎకరాల తెలుగుదేశం బినామీలు, వారి తైనాతీల స్వాధీనంలో ఉన్నాయో లెక్కలేదు. చంద్రబాబు నాయుడు ఒక కులానికి మేలు చేయడానికి మాత్రమే అమరావతి రాజధాని ప్రతిపాదన చేశారంటూ గతంలో నుంచి కూడా అనేక విమర్శలున్నాయి. ప్రజల ఎదుట అందమైన రాజధానిని కలల్లో చూపిస్తూ.. వారు ఏకపక్షంగా తోసిపుచ్చలేని స్థితిలో.. అమరావతి కలని సజీవంగా నిలబెట్టారు చంద్రబాబు నాయుడు. లౌక్యనీతిలో ఆయన తిరుగులేని నాయకుడు గనుక.. వ్యూహాత్మకంగా అడుగులు వేస్తున్నారు.

ఉదాహరణకు దాదాపు 130 వరకు కేంద్రప్రభుత్వ సంస్థలకు ఆయన భారీగా భూములు కేటాయించారు. ఎంత కామెడీ అంటే ఆయా కేంద్ర ప్రభుత్వ సంస్థలకు ఇతర రాష్ట్రాల్లో ఎక్కడా కూడా అంతటి సువిశాలమైన స్థలాలు ఉండకపోవచ్చు. చంద్రబాబు నాయుడు తనను తాను గాడ్ ఫాదర్ సినిమాలో కథానాయకుడిలాగా ఊహించుకుంటూ ‘వారు కాదనలేని ఆఫర్లు’ ఇస్తూ ఆకర్షించే ప్రయత్నం చేస్తున్నారు.

ఈ ఆఫర్ల వెల్లువలో కేంద్రప్రభుత్వ సంస్థలు రావడం నిర్మాణాలు చేయడం తథ్యం.. అయితే.. తద్వారా తెలుగుదేశం, చంద్రబాబు ఆశిస్తున్న ఫలితం మాత్రం మిగిలిన ప్రాంతాలన్నింటికి రియల్ వేల్యూ పెరగడం మాత్రమే. ఆ సంగతి మనకు రాబోయే రెండు మూడేళ్లలోనే కనిపిస్తోంది.

భూమిని మిగలనివ్వరా?

ఒక పథకం పేరిట ప్రభుత్వం తప్పుడు నిర్ణయం తీసుకుంటే దానిని దిద్దడం సులువు. అదే ప్రభుత్వం దిద్దుకోవచ్చు.. తర్వాతి ప్రభుత్వం వచ్చి రద్దు చేయవచ్చు. కానీ.. భూమి అనేది పునఃసృష్టికి అవకాశం లేని వ్యవహారం. ఉన్న భూములను పరిశ్రమలనీ, ఆఫీసులనీ మొత్తం అంగుళం మిగలకుండా అమ్మేసుకుంటూ కేటాయించేసుకుంటూ పోతే.. భవిష్యత్తు భయవిహ్వలంగా గోచరిస్తుంది. ఇంకొన్నేళ్లు గడిచేసరికి.. అసలు ఎక్కడా భూములు ఉండవు- అప్పుడు ఈ బూటకపు ప్రభుత్వాలు ఏం చేస్తాయి?

చంద్రబాబు నాయుడు సంపద సృష్టి అనేది తనకు మాత్రమే తెలుసునని చెబుతూ ప్రజలను నమ్మించి అధికారంలోకి వచ్చారు. సంపద సృష్టి అంటే భూములను అమ్మడం మాత్రమే దారి అని ఆయన అనుకుంటున్నారేమో అనిపించేలా ఉంది. కానీ ఇది ప్రజల ఆస్తిని మాయం చేసేస్తున్నదనే వాస్తవాన్ని గుర్తించాలి. మాయమాటలతో తాము తలచిన పనులు మాత్రమే యథేచ్ఛగా చేసుకుంటూ పోతున్న ఈ ప్రభుత్వాలు.. భవిష్యత్ తరాలకు ఏం సమాధానం చెబుతాయో వేచిచూడాలి.

..ఎల్. విజయలక్ష్మి