లోకాయుక్త‌, హెచ్ఆర్సీ త‌ర‌లింపును అడ్డుకుంటాం

క‌ర్నూలు నుంచి లోకాయుక్త‌, హెచ్ఆర్సీని అమ‌రావ‌తికి త‌ర‌లించొద్ద‌ని క‌ర్నూలు మేయ‌ర్ బీవై రామ‌య్య‌, క‌ర్నూలు, నంద్యాల వైసీపీ జిల్లా అధ్య‌క్షులు ఎస్వీ మోహ‌న్‌రెడ్డి, కాట‌సాని రాంభూపాల్‌రెడ్డి డిమాండ్ చేశారు. ఎట్టి ప‌రిస్థితుల్లోనూ వాటిని కాపాడుకుంటామ‌ని వాళ్లు తేల్చి చెప్పారు. ఈ మేర‌కు క‌ర్నూలు క‌లెక్ట‌ర్ రంజిత్‌బాషాకు విన‌తిప‌త్రం స‌మ‌ర్పించారు.

అనంత‌రం క‌ర్నూలు మేయ‌ర్ మీడియాతో మాట్లాడుతూ చంద్ర‌బాబు స‌ర్కార్ రాయ‌ల‌సీమ వ్య‌తిరేక విధానాల‌కు పాల్ప‌డుతోంద‌ని విమ‌ర్శించారు. వైఎస్ జ‌గ‌న్ ఇప్ప‌టికే క‌ర్నూలులో ఏర్పాటు చేసిన సంస్థ‌ల‌ను అమ‌రావ‌తికి త‌ర‌లించ‌డం ఏంట‌ని ఆయ‌న‌ ప్ర‌శ్నించారు. 1953 నుంచి క‌ర్నూలు న‌ష్ట‌పోతూనే వుంద‌న్నారు. టీడీపీ దృష్టిలో రాయ‌ల‌సీమ అంటే త్యాగం చేసేదా? అని ప్ర‌శ్నించారు.

వెనుక‌బ‌డిన ప్రాంతం కావ‌డంతో శ్రీ‌బాగ్ ఒప్పందం ప్ర‌కారం క‌ర్నూలును రాజ‌ధానిగా నాడు చేశార‌న్నారు. కేంద్రాన్ని ఒప్పించి లా వ‌ర్సిటీని జ‌గ‌న్ క‌ర్నూలుకు తీసుకొచ్చారన్నారు. సీమ‌కు చంద్ర‌బాబు చేస్తున్న అన్యాయాన్ని నిర‌సిస్తూ ఆందోళ‌న‌లు చేస్తామ‌ని క‌ర్నూలు మేయ‌ర్‌ హెచ్చ‌రించారు.

రాయ‌ల‌సీమ టీడీపీ ప్ర‌జాప్ర‌తినిధుల‌కు ప్రాంత అభివృద్ధి కంటే, రాజ‌కీయ ప్ర‌యోజ‌నాలే ముఖ్య‌మ‌య్యాయ‌ని విమ‌ర్శించారు. క‌ర్నూలుకు హైకోర్టు రావాల‌ని వైసీపీ డిమాండ్ చేయ‌డాన్ని ఆయ‌న‌ చేశారు. చంద్ర‌బాబుకు భ‌య‌ప‌డి రాయ‌ల‌సీమ‌కు టీడీపీ నేత‌లు ద్రోహం చేస్తున్నార‌ని విమ‌ర్శించారు. క‌లిసొచ్చే పార్టీల్ని క‌లుపుకుని క‌ర్నూలు నుంచి త‌ర‌లిస్తున్న కార్యాల‌యాల‌ను అడ్డుకుంటామ‌న్నారు.